🎙️ იდეიდან განხორციელებამდე – გზა სტარტაპერობასა და თვითფლობის სამყაროში

წარმატება ყოველთვის იწყება იდეით. თუმცა იდეა მხოლოდ პირველი ნაბიჯია. მთავარი არის ძალისხმევა, ნებისყოფა და ნელი, გამართული ნაბიჯებით მიზნისკენ სიარული. თითოეული გამოწვევა, თითოეული დაბრკოლება გვასწავლის, გვზრდის და გვაძლევს შესაძლებლობას შევქმნათ რაღაც მნიშვნელოვანი. არა მხოლოდ საკუთარი თავისთვის, არამედ სხვებისთვისაც.

წაკითხვის სირთულე დღეს უამრავი ადამიანის ყოველდღიურობაა. მსოფლიოს მასშტაბით ბევრი ადამიანი ებრძვის დისლექსიას ან სხვა კითხვის სირთულეებს, რაც ხშირად შფოთვას, დაბალ თვითშეფასებასა და სწავლაში სირთულეებს იწვევს. საქართველოში ცნობიერება დისლექსიის შესახებ ჯერ კიდევ დაბალია. ბევრმა ადამიანმა არც კი იცის, რომ მათი კითხვის სირთულე შესაძლოა ამ მდგომარეობასთან იყოს დაკავშირებული და სწორი ტექნიკებით პრობლემის მოგვარება გაცილებით მარტივია.

მისია

ჩვენი მიზანია შევქმნათ „თვითკითხვის“ საგანმანათლებლო აპლიკაცია, რომელიც დაეხმარება ადამიანებს ტექსტის უკეთ გაგებაში და აღქმაში  AI Summarize ფუნქციების საშუალებით. აპი არ არის მხოლოდ ტექნოლოგია -  ეს საშუალებაა, რომელიც ადამიანებს ეხმარება აიმაღლონ თვითშეფასება, მოიპოვონ მეტი დამოუკიდებლობა სწავლის პროცესში და უფრო მარტივად აღიქვან ინფორმაცია.

აპში იგეგმება გეიმიფიკაცია მომხმარებელთა მოტივაციის გასაზრდელად, ასევე ფსიქოლოგის ბლოგი, სადაც სპეციალისტი გაუზიარებს რჩევებს დისლექსიასთან და კითხვის სირთულეებთან გამკლავების გზებზე. მიზანი მარტივია: კითხვის პროცესი არ იყოს შფოთვის ან წარუმატებლობის ასოციაცია, არამედ გახდეს განვითარების, ინტერესისა და თვითშემეცნების ბუნებრივი გზა.

ახლანდელი ეტაპი

მე, როგორც  დამფუძნებელს, სტარტაპის სამყაროსთან თავდაპირველად საერთო არაფერი მქონდა. მეგონა, უბრალოდ პროექტზე ვმუშაობდი, მაგრამ ნელ-ნელა გავაცნობიერე, რომ რეალურად სტარტაპის განვითარებაზე ვმუშაობდი. შევკრიბე გუნდი, დავიწყე ცოდნის დაგროვება სტარტაპებისა და გრანტების მართვის, მარკეტინგის, ფინანსებისა და ტრენინგების გავლით.

ყველაზე დიდი გამოწვევა ჩემთვის ძველი პროფესიის დატოვება იყო. ათ წელზე მეტი ვმუშაობდი განათლების სფეროში, სადაც ჩემი სახელი უკვე დამკვიდრებული მქონდა. სხვა სფეროში გადადგმული ნაბიჯი - ახალი საქმიანობის დაწყება სრულიად განსხვავებულ გარემოში მოითხოვდა დიდ მოთმინებას, ძალისხმევასა და მუდმივ ჩართულობას.

სტარტაპერობა მოითხოვს მოქნილობას, ყურადღებას, მუდმივ აქტიურობას და მოთმინებას: თვეები მუშაობ, აწყობ, წარადგენ, ელოდები პასუხებს - შედეგი კი შეიძლება ჯერ არ ჩანდეს. სწორედ ეს პროცესი ასწავლის, რომ სტაბილურობა, სიმტკიცე და მოთმინება წარმატების წინაპირობაა.

ინსპირაცია ყოველდღიურ ცხოვრებაში

ჩემთვის, როგორც სტარტაპის დამფუძნებლისთვის,  მთავარი ინსპირაცია პროფესიულ საქმიანობაში არის ჩემი ჰობი: სირბილი და იოგა.
სირბილი მაძლევს საშუალებას გამოვუშვა დაგროვილი ემოციები - იმედგაცრუება, გულდაწყვეტა, ფრუსტრაცია და ავივსო ახალი ენერგიით, რაც საშუალებას მაძლევს სტარტაპში რთული გადაწყვეტილებები მივიღო უფრო მშვიდად და ფოკუსირებულად.

იოგა მეხმარება შინაგანი ბალანსის შენარჩუნებაში, გონებრივი სიმშვიდის მიღწევასა და სტრატეგიული აზროვნების შენარჩუნებაში, განსაკუთრებით მაშინ, როცა პროექტები მუდმივად ვითარდება და პრიორიტეტებიც სწრაფად იცვლება.
სირბილი და იოგა არა მხოლოდ პირადი ენერგიის შესავსებად მჭირდება, არამედ პროფესიული გადაწყვეტილებების მიღებას, სტრატეგიულ აზროვნებასა და სტაბილური, შემოქმედებითი მიდგომის შენარჩუნებასაც უზრუნველყოფს. ისინი მაძლევენ სტაბილურობას, შემოქმედებითობას და მოთმინებას, რაც აუცილებელია სტარტაპერობისთვის, გუნდის მართვისთვის და მიზნამდე ნელი, მაგრამ გამართული ნაბიჯებით მისაღწევად.

სამომავლო ხედვა

უახლოეს 1 წელში ჩვენი მიზანია აპის სრულყოფილი ვერსიის შექმნა და ბაზარზე გაშვება, მომხმარებელთა აქტიური ჩართულობის მიღწევა, ფიჩინგებში მონაწილეობა და პრეზენტაციების ჩატარება სკოლებსა და უნივერსიტეტებში.

პარალელურად,  „თვითფლობა“ გეგმავს ორგანიზაციული ფსიქოლოგიის თემების შექმნას პოდკასტების ფორმატში YouTube არხზე. თემები მოიცავს:

• ემოციური ინტელექტი და ლიდერშიფი;
• ფსიქოლოგიური უსაფრთხოება, თანამშრომელთა კეთილდღეობა და ორგანიზაციული კულტურა;
• ეფექტური კომუნიკაცია და უკუკავშირი;
• მოტივაცია, ჩართულობა და გუნდის დინამიკა;
• ორგანიზაციული მრავალფეროვნება, თანასწორობა და ჩართულობა;
• ცვლილებების მართვა და მოქნილობა ორგანიზაციაში;

მნიშვნელოვანია, რომ როგორც დამფუძნებელი, ამ უნარებს უკვე ვიყენებ ჩემი სტარტაპის ფარგლებში, რაც გამოცდილების გაზიარებას კიდევ უფრო რეალურს და პრაქტიკულს ხდის. გრძელვადიან პერსპექტივაში ჩვენი მიზანია, რომ „თვითკითხვის“ აპი და „თვითფლობა“ იქცეს პლატფორმად, რომელიც ადამიანებს საშუალებას მისცემს გაიუმჯობესონ ცოდნა, კითხვის უნარები, თვითშეფასება და პროფესიული განვითარება, ხოლო ქართულ ბაზარზე შემოიტანოს ინოვაციური, სოციალური და საგანმანათლებლო მნიშვნელობის გადაწყვეტები.